Тропарь, глас 1

От мятежа мирскаго отщетився, и к немерцающему свету притек, преподобне Лонгине, и ту вселився, идеже бесплотных чины, чисте зриши Святую Троицу, моли за ны, Егоже из млада возлюбил еси, и иже по смерти даром чудес обогати тя, приходящим с верою от честнаго гроба твоего подая цельбы: слава Давшему ти кре­пость, слава Прославившему тя, слава Подающему тобою исцеления.

Кондак, глас 8

По словеси Учителя Христа шествуя, и крест на рамо взем, по­сле­довал еси преподобным, образ же Животворящего Древа принесл еси, иже доныне на гробе твоем исцеление подает неоскудно с верою приходящим ко гробу твоему, Лонгине преподобне.

Молитва

О великий угодниче, преславный чудотворче и обители нашея богодохновенный наставниче, Лонгине преблаженне, душею на небеси Престолу всех Царя предстояй, телом же во святей обители сей почиваяй и различная чудеса повсюду молитвами твоими совершаяй! Призри милостивно на люди предстоящия и твоего ко Господу Богу ходатайства во обдержащих нуждах просящия, вси бо мы по множе­ству грехов наших не смеем ниже возвести очес наших на небо. Ты же, яко стяжавый дерзновение, принеси за всех, к тебе притекаю­щих, теплыя молитвы ко Господу, еже избавитися нам от глада, потопа, труса, огня, меча и брани, от людей и от диавола бывающия, и от всякия душевныя и телесныя болезни, да сих избежавше и Господу, Ему же предстоиши, работающе, внидем в некончаемый покой и прославим тамо с тобою всех благих Подателя Бога, всегда, ныне и присно и во веки веков. Аминь.