Тропарь, глас 4:

Удалився, бегая, давидски, мира и вся, яже в нем, яко уметы, вменив, и в месте безмолвне вселився, духовныя радости исполнился еси, отче наш Ниле, и единому Богу изволив служити, процвел еси, яко финикс и яко лоза благоплодна умножил еси чада пустыни. Тем благодарственно вопием: слава Укрепльшему тя в подвиге пустынножительства, слава Избравшему тя в России отшельником уставоположника изрядна, слава молитвами твоими и нас Спасающему.

Ин тропарь, глас 1:

Мирскаго жития отвергся и мятежа житейскаго бегая, преподобне и богоносне отче наш Ниле, не обленился еси собрати цветы райския и писаний отеческих и, в пустыню вселився, процвел еси, яко крин сельный, отонюдуже прешел еси в Небесныя обители; научи и нас, честно почитающих тя, твоим царским путем шествовати и молися о душах наших.

Кондак, глас 8:

Любве ради Христовы удалився мирских смущений, радостною душею вселился еси в пустыни, в нейже подвизався добре, яко Ангел на земли, отче Ниле, пожил еси: бдением бо и постом тело свое изнурил еси вечныя ради жизни. Еяже ныне сподобився, во свете неизреченныя радости Пресвятей Троице со святыми предстоя, моли, молимтися, припадающе, чада твоя, сохранитися нам от всякаго навета и злых обстояний видимых и невидимых враг и спастися душам нашим.

Ин кондак, глас 3:

Терпя, потерпел еси суетныя обычаи и мирския нравы братий твоих, обрел еси пустынное безмолвие, преподобне отче, идеже постом, бдением и непрестанною молитвою в трудех подвизався, ученьми твоими правыя стези указал еси нам шествовати ко Господу. Темже и почитаем тя, всеблаженне Ниле.

«Скитскаго жительства наставника тя почитаем, отче наш Ниле, безмолвия воистину был еси любитель, непрестанною молитвою Богу беседовал еси и поучением Божественных Писаний, и Святаго Духа вместилище был еси.

Неуклонно шествуя по стопам заповедей, всегда во уме имея страдания Спаса нашего и вольное на Кресте распятие, сраспялся еси Тому умерщвлением плоти, преподобне.

Отцев древних Святыя Горы житию подражая, Господни заповеди исполняя, во отишие пустыннаго безмолвия потекл еси, и, тамо во смирении плоды принося духа, непрестанного молитвою и ума трезвостию Богу взывал еси, и Той услыша тя — пришед бо Христос со Отцем и Духом Святым обитель в тебе сотвори.

Пресветел светильник отечеству твоему явился еси, законоположник и основатель в Российстей земли скитскаго жительства показался еси, осиявая монашествующих соборы, ныне с лики святых в Небесных водворяяся селениих, предстоя Пресвятей Троице, радуяся».

Молитва

О преподобне и богоблаженне отче Ниле, богомудрый наставниче и учителю наш! Ты любве ради Божия удаляяся мирских смущений, в непроходней пустыне и в дебрях изволил еси вселитися и яко лоза благоплодна, умножив чада пустыни, явил еси себе им словом, писанием и житием образ всякия иноческия добродетели, и, яко Ангел во плоти пожив на земли, ныне в селениих небесных, идеже празднующих глас непрестанный, водворяешися и, с лики святых Богу предстоя, Тому хвалы и славословия непрестанно приносиши. Молим тя, богоблаженне, настави и нас, жительствующих под кровом твоим, непреткновенно ходити по стопам твоим: любити Господа Бога всем сердцем своим, Того единаго вожделети и о Том едином помышляти, мужественно же и благоискусно пратися с долу влекущими нас помыслы и прилоги вражиими и тех всегда побеждати; возлюбити всякую тесноту монашескаго жития и возненавидити красная мира сего любве ради Христовы и насадити в сердцах своих всякую добродетель, в нейже сам потрудился еси. Моли Христа Бога, да и всем православным христианом, в мире живущим, просветит ум и очи сердечныя, еже ко спасению, утвердит их в вере и благочестии и в делании заповедей Своих, сохранит от лести мира сего и дарует им и нам оставление грехов и к сим приложит, по неложному обетованию Своему, и вся потребная нам ко временному животу. Да в пустыне и в мире жительствующе, тихое и безмолвное житие поживем во всяком благочестии и чистоте и Того усты и сердцем прославим купно со Безначальным Его Отцем, и Пресвятым и Благим и Животворящим Его Духом всегда, ныне и присно, и во веки веков. Аминь.