Тропарь, глас 8

Новоявленнаго угодника Божия почтим, Корнилия преподобнаго, крест на рамо вземшаго, иго Христова усердно понесшаго, иже на невидимыя враги мужественно подвизався и козни их поправ, яко добр воин, Владыце Христу предста и молится о душах наших.

Кондак, глас 2

Вышняя получити желая, в Вышних Живущему неленостно поработал еси, блаженне, да наследиши горняя, презрел еси дольняя, не токмо очи отвратив не видети суеты, но и устнами твоима молчание наложив не глаголати суетная, обаче немолчным сердцем воспел еси Богу. Не умолчи убо и ныне, о нас моляся, Корнилие преподобне.

Молитва

О великий постниче, безмолвниче, помощниче в скорбех и заступниче в бедах, преподобне отче наш Корнилие! Услыши нас, в час сей моля­щихся тебе, и не умолчи убо о нас ко Господу с лики святых преподобных, не забуди нас, чад своих, посещая, и не умедли в молитвах своих в скорбных и в бедах страждущих и всех, притекающих
к тебе, ныне и присно и во веки веков. Аминь.