Тропарь, глас 8:

Возвысився на добродетель, измлада возлюбив монашеское житие, к желанию доблественне достиг, вселился еси в пещеру, и украсив житие твое пощением и светлостию, в молитвах яко бесплотен пребывал еси, в Российстей земли яко светлое светило просияв, отче Феодосие, моли Христа Бога спастися душам нашим.

Кондак, глас 3:

Звезду Российскую днесь почтим, от востока воссиявшую, и на запад пришедшую, всю бо страну сию чудесы и добротою обогатившу, и вся ны содеянием и благодатию монашескаго устава, блаженнаго Феодосия.

Молитва

О священная главо, Ангеле земный и человече небесный, преподобне и богоносне отче наш Феодосие, изрядный слуго Пресвятыя Богородицы, во имя Ея святое обитель пречудну на горех Печерских соорудивый и в ней чудес множеством просиявый! Молим тя со усердием многим, молися за нас ко Господу Богу и испроси от Него великия и богатыя милости: веру праву, надежду спасения несомненну, любовь ко всем нелицемерну, благочестие непоколебимое, душ и телес здравие, житейских потреб довольство, и да не во зло обратим благая, даруемая нам от щедродательныя Его десницы, но в славу имене Его святаго и во спасение наше. Сохрани, угодниче Божий, предстательством твоим святым страну нашу, Церковь православнороссийскую, град твой и лавру твою невредимыми от всякаго зла, и вся люди, притекающия на поклонение к честному твоему гробу и пребывающия во святей обители твоей осени небесным твоим благословением и от всяких зол и бед милостивно избави. Наипаче же в час кончины нашей покажи нам многомощное твое покровительство: да избавимся молитвами твоими ко Господу власти лютаго миродержца и сподобимся наследити Царство Небесное. Яви нам, отче, благосердие твое и не остави нас, сирых и беспомощных, да выну славословим Дивнаго во святых Своих Бога, Отца, и Сына, и Святаго Духа, и твое святое заступление во веки веков. Аминь.